Qelb, parçek ji laşê mere ye. Ew parçe çawa be parçê din jî rewşa wan ew e. Aqil wek neynikekê ye çi çibe, wî werê rê dide. Qelb dinya hisa ye. Çi tamên hisî hebin di wir de ne. Wexta stirîyek di lingê min here qelb jî wê êşê parve dike.

         Tiştê eşkere û veşartî tevde di qelb de derbas dibin. Qelb hêlin e ji hisan re. Hinek his xwe lê datînin, hinek jê difirin. Ji ber ku hinek his tahmula wan ji hevre tune, wexta yek xwe li wê hêlina dine, a din mecbûr bifire.

         Wexta yek ji mere re bêje, ‘’aqlê te bêtir tu ye an qelbê te?’’ Bê guman wê bersîva min ‘’qelbê min’’ be. Ji ber ku her wext qelbê min derdê min dikşîne. Erê aqil rê bi ber mere dixe, le qelb jî her wext hevaltîyê bi mere re dike.

         Wexta ez gunehekî bikim, ne aqlê min, qelbê min reş dibe. Wexta ez xêrekê jî bikim dîsa dilê min firehî dikevêyê. Rewşa min û rewşa qelbê min yeke. Dilşadîya min, dilşadîya wî ye. A wî a min e.

         A emelekî dike xêr an guneh, rewşa qelb e. Nîyeta qelb çi be emel werê tê qebul kirin. Kesîtîya mirov li gora qelb dimeye.

         Di vê heyama de qelb jî şaş maye. Xeml pir bûye, tiştên xwezayî kêm bûnin. Ji ber vê rewşê qelb jî maye heyirî. Helbestvanê Pakîstanê dibêje ‘’Felaketa vê sedsalê eve: Qelbê mirovan heye le mirov nizanin bê wê bi vî qelbî ji kê hezbikin.’’ Bi rastî mirov di vî wextî de şaş maye û li xwe heyirîye.

        Me got qelb di vê sedsalê de şaş maye û bi rastî bê huzur e. Le em tiştekî werê jî zanin ku ew jî eve: Qelb hew bi zikrê Xwedê dilxweş dibin. Ji ber vî awayî qelbê ku şaş maye û bê huzur, dikare bi zikrê Xwedê xwe dilşad bike.

        Îro ji bo çi li dinyê dil ne rihetin? Ji bo çi zilm û zorî pir bûye? Ji bo çi mirov nema li hevdu guhdar dikin? Û a girîngtir ji bo çi mirov nema ji hev hez dikin? Sedema vana gişa, ji qelbê nesax e. Ji qelbê tert girtî ye. Ew jî wê çawa dîsa bi ser hişê xwe de were? Bi zikrê Xwedê û bi îxlasê û bi emelê salih.

        Qelb jî demê wî hene. Di demna de gelek bi coş e. Demna jî wek xewara ye. Dema bi coş bêtir xortanî ye. Di vê heyamê de qelb gelek kesa dike mivan. Le hew ji bo ê taybet direqise.